Sei bertso

1
Sei bat bertsotan kontatuko det
gertakizun bat larria,
bestetan ere ikusi dugu
ez baita kontu berria.
Itsukeria nagusitu da
zikinduz gure herria.
Badirudi aspaldin dagola
odol egarriz piztia.
2
Abenduak lau egun zituen
laino mardula zeruan,
Inaxio Loiolara heldu zen
eguneroko moduan.
Bere zain hantxe zeuden ixilik
pistola hotza eskuan,
ezertxo esan gabe diote
bala bat sartu buruan
3
Alkateak gaur adierazi du
bere dolu ta samina,
baina gogora behar omen da
gainontzekoek egina.
Bestea litzake egoera
sendo balitz alegina.
Urrun legoke erokeria
garbiki kontra bagina.
4
Protestarako elkartu dira,
bukatu da elizkizuna.
Lagun, ezagun, jende ugari
ta malkotan alarguna.
Karraxi sakon eta ozen bat
zan hango ixiltasuna,
Izarraitz inguruan entzun da
oihuaren oihartzuna.
5
Euskal Herriak azken urtetan
horrelakoxeak dauzka,
pentsatze bakarrak ematen dit
amorrua eta nazka.
Gaiztoa zela esango dute,
horrela dela gatazka.
Arrazoi antzuz beteko dute
aitzaki faltsuen aska.
6
Kristal argi ta fin bat bezela
hala da gure bizitza,
noraezean eta galduta
aspaldi hontan gabiltza.
Errespetua ta elkarlana
da pakearen baldintza.
Gizartearen eskutan dago
huraxe lortzeko giltza.